Kryetari i Aleancës për Ardhmërinë e Kosovës (AAK), Ramush Haradinaj, po vazhdon vizitën e tij zyrtare në Shtetet e Bashkuara të Amerikës.

Gjatë kësaj vizite, ai është pritur në Pentagon, ku ka zhvilluar takime të rëndësishme me zyrtarë të lartë amerikanë.

Deputeti Besnik Tahiri, i cili po e shoqëron Haradinajn, ka ndarë pamje të pritjes së tij në Pentagon përmes një postimi në Facebook.

Tahiri ka theksuar se Haradinaj “nga kjo portë e madhe e Pentagonit doli kur mori bekimin nga Sekretari i Mbrojtjes, James Mattis, për themelimin e Ushtrisë së Kosovës. Sot ai po hyn për të argumentuar nevojën për anëtarësimin e përshpejtuar të Kosovës në NATO.”

Pas vizitës në Pentagon, Haradinaj pritet të zhvillojë takime të tjera në Departamentin e Shtetit, si pjesë e përpjekjeve të tij për të avancuar pozicionin ndërkombëtar të Kosovës, veçanërisht në rrugën drejt anëtarësimit në NATO./Arbresh.info/